粵語童謠

粵語童謠是指流傳於使用粵語的地區的童謠。

發展
粵語童謠是由普羅大眾所創作，約定俗成，在傳唱過程中會出現不同的版本，但無人會規定哪個才是「權威」版本。

隨著1949年大批移民抵達香港，香港地區繼承了很多華南地區的童謠，如「月光光」、「賣懶」等。70年代末期，隨著日本卡通在香港TVB電視台播放，以及社會的需求，大量新的粵語兒歌湧現，如小時候、飄零燕等。

現狀
由於受推廣普通話的影響，不少廣東的粵語童謠有消失的危險。許多幼兒園教師不會粵語，只教普通話兒歌，導致小朋友不會唱粵語兒歌，對此，有專家建議將這些廣府文化編入教材。

不過，也有一些童謠至今保持頑強的生命力，如「落雨大」：

該童謠不僅在廣東和廣西的粵語社群中有廣泛的流傳，更常被市民和媒體用於調侃城市的「水浸街」（內澇）問題，還在廣州亞運會開幕式出現過。

常見粵語童謠
*《月光光》月光光，照地堂；年卅晚，摘檳榔；檳榔香，嚼子薑；子薑辣，買蒲達；蒲達苦，買豬肚；豬肚肥，買牛皮；牛皮薄，買菱角；菱角尖，買馬鞭；馬鞭長，起屋樑；屋樑高，買張刀；刀切菜，買籮蓋；籮蓋圓，買條船；船浸底，浸親兩個番鬼仔；一個蒲頭，一個浸底；一個摸茨菇，一個摸馬蹄。
*《月光光》月光光，照地堂，蝦仔你乖乖瞓落床，聽朝阿爹要捕魚蝦囉，阿嫲織網要織到天光。
*點蟲蟲，蟲蟲飛，飛到荔枝基；荔枝熟，摘邊樸，邊樸啖啖肉。
*點貓貓，貓婆竇，問你捉豬又捉牛？捉到黃牛三百兩，球揣球，開花點豉油。
*荔枝熟，摘滿屋；屋滿紅，伴住個細蚊公。
*排排坐，食粉果；豬拉柴，狗透火；貓兒擔凳姑婆坐；坐埋一齊唱支歌。
*凼凼轉，菊花園；炒米餅，糯米團；五月初五係龍舟節啊，亞媽佢叫我去睇龍船；我唔唔去睇，要去睇雞仔；雞仔大，搦去賣；賣咗幾多錢？賣咗幾多隻啊？我買隻風車仔，佢轉得好好睇，睇佢凼凼轉啊菊花園，睇佢凼凼轉啊凼凼轉啊轉。
*ABCD，大頭綠衣；捉人唔到，吹BB。
*落大雨啦雞仔貪玩，冷到傷風真真慘。論盡鴨仔擔朵花瓣，當作撐開小雨傘。魚仔生猛，蝦仔生猛，青蛙水中跳低欄。遇著母雞，今天生蛋，五隻雞仔通處逛。
*落雨大，水浸街，阿哥擔柴上街賣，阿嫂出街着花鞋，花鞋花襪花腰帶，珍珠蝴蝶兩邊排。
*賣懶去，買精歸，賣咗懶仔過新年，食過年飯好種田。
*賣懶，賣懶，賣到年卅晚，人懶我唔懶。
*細蚊仔，瀡滑梯，因住跌落嚟；咪學陳德貴，成日流鼻涕，跌親籮柚唔好睇。
*河邊有隻羊，羊邊有隻象，象邊有隻馬騮仔，好似你噉樣。
*咬蔗須，要睇毛，短毛輸，長毛贏，冇毛唔算數。
*搣開柑，數柑核，邊個核多就邊個贏，唔准手賴就縮骨。
*拍大髀，唱山歌，人人話我冇老婆，扚起心肝娶翻個，有錢娶個嬌嬌女，冇錢娶個豆皮婆，豆皮婆，食飯食得多，屙屎屙兩籮，屙尿沖大海，屙屁打銅鑼。
*呈尋剪，呈尋包，呈尋糯米叉燒包。老鼠唔食香口膠，要食豆沙包。
*伏匿匿：一就預備，二就匿埋，三就開盤，四就嚟到，𠾴到算數。
*點指兵兵，點指賊賊，點著誰人做大兵，點著誰人做大賊。
*估手指，要估中，邊個唔中，就唔中用，褲浪底見個窿。
*騎牛牛，牛牛走，牛牛響前咪回頭，若然回頭就打籮柚。
*大眼雞，鹹魚頭，你屙尿，唔洗手。
*咕碌咕碌一，咕碌咕碌二，咕碌咕碌三，準備開炮打敵人！
*董存瑞，十八歲，為國犧牲炸堡壘，炸到堡壘ngok7 ngok7脆，全國人民流眼淚。
*轆銅仙，打銅錢，全憑眼界手出變，叮響銅錢畀個仙。
*打泥炮，泥炮響，唔使摣槍上戰場。
*折紙機，麻鷹飛，飛嚟飛去唔落地，麻鷹有條尾。
*咚啄，酸薑，你亞嫲，纏腳娘。
*趌跛跛，跳跳腳，咚咚咚，上跳下跳似麻雀。
*趌跛跛，跛咗蹄，冇米煮，煮泥沙，冇屋住，住樓梯，樓梯有只鬼，嚇到你瓹落床下底。
*伸長手，頂手掌，死人都要頂硬上，齜牙繃哨就貓噉樣。
*劈友，劈友，快啲走，走得快，好世界，走得嚤，冇鼻哥。
*鬥遠掟石頭，因住咪甩手，石頭最冇眼，掟親唔好眼淚流。
*掟磚頭，鬥大嚿，一掟掟到西門口，濺起浪花拋浪頭。
*花手巾，真引人，基邊撈魚好過癮，一兜一條好手運，千祈唔好踎到你頭暈。
*黐塘尾，塘尾飛，飛到菜田基，田基有條蛇，嚇親你兩仔爺。
*煮飯仔仔先落米，風爐透火柴對齊，千祈唔好咁俹簁，我哋係細蚊仔。
*一人騎膊馬，兩人騎豬乸，三步要埋頭，撞到面就打。
*紅辣椒，綠辣椒，平時你caak8/caat8嘴藐藐，今日你冇膽同我撩。
*鬼叫你咁貪心，聞咗我個屁，嗍咗入個鼻，我要你賠翻二兩四。
*氼水底，摸泥沙，摸到泥沙當金龜，摸唔到系契弟。
*陳德貴，住得矮，床下底有只鬼，嚇到瓹臺底。
*一二三，三二一，肥婆跳舞頂第一！
*過天梯，欺(haa1/hap7)矮仔，人在雲東過到西，唔怕米貴就最怕矮。
*黑面李逵，紅面關公，三國水滸亂哂龍，打敗清兵系英雄。
*打棋子，靠眼屎，全憑眼界靠本事，唔好睇錯認鳩屎。
*乞兒仔，畫烏龜，一人一筆咪亂嚟，最後嗰個正衰仔！
*大笨象，摣支槍，去打仗，打完仗，翻嚟食碗鹹酸薑。
*男兒食飯跳過凳，女兒食飯磨穿裙。
*鋼盔個大頭佛，着鞋就唔着襪。
*有隻雀仔跌落水，跌落水，有隻雀仔跌落水，被水沖去。
*肥仔個頭，大過五層樓，肥仔隻手，細過荷蘭豆。
*雞公仔，尾彎彎，做人新婦甚艱難！早早起身都話晏，眼淚唔乾入下間，下間有個冬瓜仔，問安人老爺煮定蒸：安人又話煮，老爺又話蒸，蒸蒸煮煮唔中安人老爺意，大揸拉鹽又話淡，手甲挑鹽又話鹹，三朝打爛三條夾木棍，四朝跪爛四條裙！咁好花裙俾你跪爛，咁好石頭俾你跪崩！橫又難，直又難，不如捨命落陰間！人話陰間條路好，我話陰間條路好艱難！
*秋蟬喊，荔枝熟，阿婆喊，買豬肉。

註釋
參考資料
外部連結
*
*